Бүгінгі таңда өскелең ұрпақты білімді, ізденімпаз, еңбекқор, ел болашағына жауапкершілікпен қарайтын азамат етіп тәрбиелеу – білім беру саласының маңызды міндеттерінің бірі. Осы бағытта елімізде жүзеге асырылып жатқан «Таза Қазақстан» жалпыұлттық бастамасының тәрбиелік мәні ерекше.«Таза Қазақстан» – қоршаған ортаны таза ұстаумен ғана шектелмейтін, қоғамда жауапкершілік, еңбекқорлық, мәдениеттілік, ұқыптылық және туған жерге деген сүйіспеншілік құндылықтарын қалыптастыруға бағытталған маңызды бастама. Мектеп қабырғасында осы құндылықтарды оқушылардың күнделікті өмірімен сабақтастыра отырып, олардың азаматтық жауапкершілігі мен қоғамдық белсенділігін арттыруға мүмкіндік мол.Елдің болашағы – білімді, ізденімпаз және жаңа идеяларға ұмтылатын жас ұрпақтың қолында. Сондықтан оқушыларды ғылыми-зерттеу жұмыстарына, шығармашылық жобаларға, зияткерлік байқаулар мен танымдық іс-шараларға тартудың маңызы зор. Ғылымға қызығушылық танытқан оқушы өздігінен ізденуге, мәселені талдауға, тың идея ұсынуға және өз еңбегінің нәтижесін бағалауға үйренеді. Әрбір ғылыми жоба мен шығармашылық ізденіс – баланың өз мүмкіндігін танып, қоғамға пайдалы іс жасауға ұмтылысының көрінісі.Жаңашылдыққа бейім, білімге құштар ұрпақ – елдің интеллектуалдық әлеуетін арттыратын негізгі күш. Осы орайда білім мен тәрбиені өзара сабақтастыра отырып, оқушылардың шығармашылық қабілетін дамыту, олардың ғылымға, ізденіске және жаңа бастамаларға қызығушылығын арттыру – бүгінгі мектептің маңызды бағыттарының бірі.Сонымен қатар жас ұрпақты жасампаз еңбекке баулу – тәрбиенің ажырамас бөлігі. Мектеп ауласын абаттандыру, көгалдандыру, тазалықты сақтау, қоршаған ортаны қорғауға бағытталған акциялар мен қоғамдық жұмыстарға қатысу арқылы оқушылар еңбектің қадірін түсінеді. Өз қолымен атқарған әрбір игі іс баланың бойында жауапкершілік, ұқыптылық, ұйымшылдық және ортақ іске үлес қосу қасиеттерін қалыптастырады.Еңбекке баулу – белгілі бір жұмысты орындауға үйрету ғана емес, ол – баланың өмірге деген көзқарасын қалыптастыратын маңызды тәрбиелік үдеріс. Еңбектің нәтижесін көрген оқушы өз ісіне жауапкершілікпен қарауды, қоршаған ортаны қадірлеуді және қоғамдық ортаға ұқыпты болуды үйренеді.Тазалық – адамның мәдениеті мен қоршаған ортаға деген жауапкершілігінің көрінісі болса, еңбек – оның азаматтық ұстанымын қалыптастыратын маңызды құндылық. Сондықтан оқушыларға «Таза орта – таза ой, сапалы білім – жарқын болашақ» қағидасының мәнін түсіндірудің маңызы зор. Тазалықты сақтау, табиғатты аялау, мектеп мүлкіне ұқыпты қарау сияқты қарапайым әрекеттердің өзі оқушының күнделікті мәдениеті мен жауапкершілігін қалыптастыруға ықпал етеді.Мектеп – тек білім беретін орта ғана емес, тұлғаның азаматтық, адамгершілік және әлеуметтік қасиеттері қалыптасатын тәрбие ордасы. Осы орайда ұстаздар мен ата-аналардың бірлескен жұмысы ерекше маңызға ие. Отбасы мен мектептегі тәрбиелік талаптардың өзара сабақтастығы баланың жауапкершілікпен әрекет етуіне, еңбекке құрметпен қарауына және қоғамдық ортада белсенді болуына мүмкіндік береді.«Таза Қазақстан» аясындағы әрбір игі бастама – елге, туған жерге деген жанашырлықтың нақты көрінісі. Бүгінгі оқушының табиғатты қорғауға, мектеп ортасын таза ұстауға, ғылыми ізденіске және жасампаз еңбекке қосқан шағын үлесі ертеңгі үлкен жетістіктердің бастауына айналуы мүмкін.
Сондықтан жас ұрпақты білім алуға, ғылымға ұмтылуға, жаңашылдыққа бейім болуға, еңбек етуге, табиғатты аялауға және қоғам игілігіне үлес қосуға баулу – баршамызға ортақ міндет. Таза орта, озық ой, сапалы білім және жасампаз еңбек тоғысқан жерде жауапты азамат, зерделі ұрпақ және жарқын болашақ қалыптасады.
Жетісай ауданы
«М.Әуезов атындағы №31 ЖББМ»кмм
ДТЖЖО: З.С.Аязбекова
Кітапханашы З.Назарбеков